张倩伶/如果嗰日嚟到

1. 大人成日话我地系幸福嘅细路
冇经历过打仗
冇挨过苦饿过肚
想要乜嘢就得到乜嘢
其实我唔知我地究竟幸唔幸福
因为除咗电视嗰啲着西装嘅人
根本就冇人笑过
朝早返学嘅时候
我一直听到隔离黄婶嘅喊声
以前教过我补习嘅小宁姐姐都唔见咗
点解黄婶唔去揾返佢嘅女咧

2. 老师话我地唔可以嗌碧咸
要嗌贝克汉姆
唔可以嗌拎走
要嗌外带
唔可以嗌的士
要嗌出租车
唔可以嗌巴士
要嗌公交车
唔可以嗌依条片
要嗌视频
唔可以嗌雪糕
要嗌冰淇淋

3. 头先落咗一场大雨
我仲记得前面班嘅女仔借过我佢把遮
我想还返俾佢
但系佢嘅同学话佢失踪咗好耐
我返屋企揾嗰把遮出嚟
竟然是黑色噶
政府前几日宣布过差佬会拉嗰啲着黑衫带黑遮落街嘅人

4. 我谂到我曾经读过一个台湾作家嘅小说
男主角一瞓醒就发现佢嘅世界已经乱晒大路
冇一个人可以讲正常嘅语言
作家话依个系符号失序
男主角为咗唔忘记佢自己嘅语言
日日喺佢嘅台写低一排数字
点解同香港咁似嘅
呢度已经冇人识讲广东话了

5. 我由细到大都听到一啲奇怪嘅声
我睇住金紫荆广场嘅红色旗
我听到维港嘅海底下边有好多好多人喊